> Zurück

Der letzte Dorfzeitungsbericht:

Burri Simon 20.10.2014

OK Wildsouchilbi

Liebi Bipperinne u Bipper Wär flissig d Dorfzitig list, hets sicher gmerkt, bim letschte Bricht het sich es fausches Logo igschliche, wöu die Chilbi, ou we si Wildsouchilbi heisst, het es angers Logo aus das vor Wildsauzunft zu Niederbipp. S OK Wildsouchilbi isch e eigete Verein wo die Mitwirkende Vereine aus Mitglider dinne si… Aber nach dere churze Klärig, weti vor Chilbi säuber verzöue! Scho isch Sie wider verbi, schnäu ischs gange u e grossi Arbet vo aune beteiligte Vereine isch drhinger gschteckt. D Stüblis si super dekoriert u zwäggmacht xi, u s het Vereine gä, wo scho die ganzi Vor-Chilbiwuche am ufstöue u verschönere vo ihrem stübli si xi. I däm Joor het ou s Wätter super mitgspiut u me het bi strahlendem Sunneschin übere Märit chönne loufe. We eim de es Hüngerli oder es Dürschtli blogget het, hets Mängs Stübli gä, wo me däm het chönne Abhiuf schaffe. Mir si sehr stouz, chöi mir a üsere Wildsouchilbi so nes breits Spektrum a Verpflegigsmöglichkeite abiete. Do hts sicher für jede Gschmack öpis drbi. Dr Vorstand vom OK wet sich bi aune Vereine wo sich so müeh gä hei für ihre grosse Isatz bedanke u mir hoffe s heig ihri Erwartige erfüut! Wo mr do ou grad drbi si geit ou e grosse Dank a die Lüt wo d Vereine ungestützt hei, sig das wöu dr nech bi ne verpflegt heit oder wöu dr em Vorstand uf sire Tour öpis wo aune Vereine z guet chunnt heit ids Kässeli glo! Bim zöue, si mr sehr überrascht xi, wieviu Grosszügigkeit u Vereinsungestützig do ich ads Tagesliecht cho! Do im Sinn vo aune Vereine e dank! Witer Danke mr dr Gmein u üsne Gmeins-Kontaktpersone für d Zämearbet, s Bereitstöue vo de Stübliplätz u d Finanzsprützi! Damit i sicher niemer vergisse, geit no ei Dank a aui wo i irgend ere Art öpis für die Chilbi gmacht hei! :0) Mir vom Vorstand freue is scho uf s nöchschte Joor, we wider Wildsouchilbi-Wucheänd isch u hoffe dass mr wider so nes glungnigs, zwüschefausarms Fescht chöi ha. 

 

Freundliche Grüsse

 

OK Wildsouchilbi