> Zurück

Dankes-Dorfzeitungsbericht:

Burri Simon 20.10.2015

OK Wildsouchilbi

Liebi Bipperinne u Bipper

Iwet chli öpis vor Chilbi 2015 verzöue! Scho isch Sie wider verbi, schnäu ischs gange u e grossi Arbet vo aune beteiligte Vereine isch drhinger gschteckt. D Stüblis si super dekoriert u zwäggmacht xi, u s het Vereine gä, wo scho die ganzi Vor-Chilbiwuche am ufstöue u verschönere vo ihrem Stübli si xi.

I däm Joor het s Wätter nid ganz so wöue mitspile wie im letschte Joor. Shet am Samschti leider immerwider chli grägelet u trotzdäm hani viu bekannti, aber ou neui Gsichter xe a dere Chilbi u am Märet am Samschti.

We eim de es Hüngerli oder es Dürschtli blogget het, hets Mängs Stübli gä, wo me däm het chönne Abhiuf schaffe. Mir si sehr stouz, chöi mir a üsere Wildsouchilbi so nes breits Spektrum a Verpflegigsmöglichkeite abiete. Do hetz sicher für jede Gschmack öpis drbi. Dr Vorstand vom OK bedankt sich bi aune Vereine wo sich so müeh gä hei u für ihre grosse Isatz. Mir hoffe s heig ihri Erwartige erfüut! Wo mr do ou grad drbi si geit ou e grosse Dank a die Lüt wo d Vereine ungestützt hei, u sich i de verschidnige Stüblis u Bars verpflegt hei!  Witer Danke mr dr Gmein u üsne Gmeins-Kontaktpersone für d Zämearbet, s Bereitstöue vo de Stübliplätz u d Finanzsprützi!

Damit i sicher niemer vergisse, geit no ei Dank a aui wo i irgend ere Art öpis für die Chilbi gmacht hei! :0)

Was is aber i däm Joor vom Vorstand o uno sehr wichtig isch, mir wie is bi üsem abträtende Presidänt, em Stefan Röthlisberger bedanke, är isch 9 Joor ar Spitze, zerscht vom OK u sit dr Vereinsgründig ar Spize vom Vorstang xi.. Är het i dene Joor mängi Stung i die Chilbi investiert und het viu Arbet ids Glinge vor Chilbi gsteckt. Am Eröffnigsapero hei sich d Stüblibetriber u die Awäsende ou scho mit langahautendem Applaus bedankt, u mir vo sim Vorstang chöi jetz nüt meh säge aus: DANKE FÜR DIE COOLI ZIT U AUES GUETE FÜR DIE KOMMENDE PROJEKT! ;0)

Mir, dr blibend räscht vom Vorstand freue is scho uf s nöchschte Joor, we wider Wildsouchilbi-Wucheänd isch u hoffe dass mr wider so nes glungnigs, zwüschefausarms Fescht chöi ha.

 

Freundliche Grüsse 

 

OK Wildsouchilbi