> Zurück

Werbe-Dorfzeitungsbericht 2016:

Burri Simon 17.08.2016

OK-Wildsouchilbi

 

Liebi Bipperinne, Bipper u Chilbi-Gänger

So jetz isch es scho gli wider so wit u dir gseth mi a de Dorfigäng u Strosseränder stoh. Das mach i natürli nid nume zum Spass, sondern für Wärbig z mache. Üsi Wildsouchilbi isch zwar scho viune e Begriff doch wei mr doch ou aune angere zeige, das hie einisch im Joor d Wildsou es Wucheänd lang dürs Dorf tanzt. Und das bi äbe ig!

I däm Joor sött me sech dr 20. u dr 21. Oktober frei haute u öppe e Wuche vorhär dra dänke, dass me a däm beschribne Wucheänd viu Platz im Buch für z Ässe u z Trinke brucht. Wöu es wird wirkli einiges a Kulinarischem bote. Bir Wildsauzunft gits im Fischerbeizli Fisch und bir Trachtegruppe es Kaffi u Chueche. Bim Gmischte Chor chöit dr ir Apero & Cüpli Bar eis go nä. De göi dr witer id Füürwehr-Pinte go es Mass stemme u wär luscht het cha sech o dert verpflege. Nächer geit me vilich mou zum WC-Wage, wo au Joor wider für d Dringlichkeite zwäg isch. Glöst u mit nöiem Platz im Buch chöit dr de grad bi de Notefucher go Pastetli ässe. We dr nach däm gäng no Platz im Buch heit für ds Ässe chöit dr grad witers zum HGV Stübli. Det gits feinei Flammchueche. We dr aber lieber zersch e Pouse ka hättet, de cha ni nech d Mottobar vo de Fasauke empfähle. Egal wie drs machet, uf jede Fall wär nächer s’Thai-Stübli dra.

U langsam bechumi Angscht um nech, wöu bir nöchste Attraktion muess e Stäge erklomme wärde, u nach dere Tour heit dr doch sicher scho eis zwöi Wyyli intus. Auso mache mr zersch mau es Spaziergängli zur Katholische Chile wo dr im Grotto Italiano mit italiänische Spezialitäte wider chöit bödele (oder haut no eis blötterle…). So, jetz aber zrügg, zum Usgangspunkt Thai-Stübli, wöu we me vo dert grad links luegt gseth me s nöie FC-Stübli, wos Hamburger u Schnitzubrot git. U we dr später wider chli Luft bruchet, schländeret dr übere i die Souwöudi-Schnee-Bar u gniesset dert d Party-Stimmig.

So das wär e Vorschlag für e Rundgang, dir dörft aber natürlich wild mischle und ou jedes Stübli mehr mals bsueche, ganz wie dr weit! U wöu das jo doch chli viu isch zum merke (Fastenwoche, u aui Stübli) chunt im Vorus no e Flyer ids Huus, dä isch gäbig zum Mitnäh u vorab für die gnau Ruteplanig vo Vorteil!

Ig freue mi öich aui a däm Wucheänd z  gseh!  

 

Liebi Grüess   Öii Wildsouchilbi Wildsou

 

OK Wildsouchilbi

Simon Burri, Präsident