> Zurück

Ausschnitt aus der Dorfzeitung Nr. 05/2017:

Burri Simon 13.11.2017

Liebi Bipperinne u liebi Bipper

Scho isch d'Wildsouchilbi 2017 wider verbi. Leider ischs wie au Johr vöu zschnäu gange…;) Mir vom OK chöi zrüggluege uf ne grandiosi Chöubi 2017! E grossi Arbeit vo aune beteiligte Vereine isch drhinger gschteckt. D'Stüblis si super dekoriert u zwäggmacht xi, u es het Vereine gä, wo scho die ganzi Vor-Chilbiwuche am ufstöue u verschönere vo ihrem Stübli si xi.

I däm Johr hei mir mit em Wätter sehr schwein gha u me het bi strahlendem Sunneschin übere Märit chönne loufe. We eim de es Hüngerli oder es Dürschtli bloget het, hets mängs Stübli gä, wo me däm het chönne Abhiuf schaffe. Mir si sehr stouz, chöi mir a üsere Wildsouchilbi so nes breits Spektrum a Verpflegigsmöglichkeite abiete. Do hets sicher für jede Gschmack öpis drbi gha.

Ou dr Jodlerclub Heimelig vo Wangenried het am Samschti mit sine Lieder vili chönne begeischtere. Merci vöu mou! Mir fröie üs ou, dass es immer nöii Idee git, zum üsi Chilbi z'berichere, wie zum Bispiu das Johr wo ou ds erschte Mou e Gottesdienscht ar Chilbi stattgfunge het. Witer hets nöi dTankstöu mit LIVE-Musik, dHavanna-Bar und dAprès-Ski-Bar gä. Sörigi Idee und de natürli ou d Umsetzig si üs sehr wiukomme. Wenn öper so e Geischtesblitz het zum üsere Chilbi no e nöii Richtig zgä, darf me sich jederzit bim ne Vorstandsmitglied mäude!

Dr Vorstand vom OK bedankt sich bi aune Vereine wo sich so müeh gä hei u für ihre grosse Isatz. Mir hoffe d'Chilbi heig ihri Erwartige erfüut! Wo mr do ou grad drbi si geit ou e grosse Dank a die Lüt wo d'Vereine ungestützt hei u sich bi ne verpflegt hei. Do im Sinn vo aune Vereine e grosse Dank a üsi Gescht! Witer Danke mr dr Gmeind u üsne Gmeins-Kontaktpersone für d Zämearbet, s Bereitstöue vo de Stübliplätz u d Finanzsprützi! Damit i sicher niemer vergisse, geit no ei Dank a aui wo i irgend ire Art öpis für die Chilbi gmacht hei! :0)

Mir vom Vorstand freue is scho uf s ufs Wocheändi vom Friti, 19. und Samschti, 20. Oktober 2018, we wider Wildsouchilbi-Wucheänd isch. Mir hoffe dass mr wider so nes glungnigs, zwüschefausarms Fescht chöi ha und uf öiche Bsuech chöi zöue! ;)

Liebi Grüess OK Wildsouchilbi

 

OK Wildsouchilbi

Simon Burri, Präsident